国泰
該用戶已被刪除
|
从结石娃娃谈起
自从三聚氰胺事件闹得沸沸扬扬起,结石娃娃、结石宝贝好似越来越多，甚至某氏奶粉亦被点名，某氏急于表态唔含三聚氰胺；......。睇起嚟结石罪魁祸首系奶粉。
我响前几日同家榕、捞B等同学倾偈时亦倾过呢个话题。我从另一角度嚟睇，既唔排除某啲奶粉作怪，又要从大气候环境、饮食习惯等嚟分析。呢个问题响前日开始有报纸提出嚟。
记得响七、八十年代，香港流行唔用母乳喂养婴儿，全部用奶粉，为的是保持妈咪嘅体型。结果呢啲宝贝唔少免疫力差、体质弱，好短时间亦恢复旧传统。由于现时工作、生活压力大，好多人都会选择自生一个，因而就会更加注重苏虾仔嘅保育喂养，就摧生咗月嫂呢个行业；婴儿护理课程、婴儿饮食配方亦纷纷出笼；唔少“专家学者”亦大撰文章、唔少人亦跟风扯猫尾。唔否定有啲护理、配方有其科学性，某啲奶粉会根据婴儿唔同阶段发育采用唔同营养搭配嘅合理性。亦有必要怀疑会有其它不足或副作用。但细观周围人群，多数系盲目跟风，信其一方否认其余，唔会结合地域差异、生活环境气候、体质差异等等客观因素。后生一代睇唔起老一代嘅老土，老一代亦睇唔惯后生一代嘅新潮，出现后生一代唔俾“爷佣”“嫲佣”插手，老一代亦唔放心，经常及住嗮。其实老一辈有老一辈凑细路嘅经验（如饮食调理、表情判断、保健茶水等），亦有其不足（如喂食卫生等）；后生有后生优势——信科学（毕竟新嘅哺育方式有其科学性及合理性），但存在住较主观、忽视周边相关嘅学问嘅弱点。（如用水就有水质和水量问题，记得七十年代我在肇庆地区医院实习时就听讲西江沿岸地区多结石，就系与水质有关，因而当时根据遵义医院有效配方结合当地实际，制定咗中西结合、运动与用药结合嘅疗程，效果较理想。）
在浮躁嘅社会、浮躁嘅人群中，呢啲事数不胜数，我已养成用平常心嚟睇，现时好多出于某啲目的搞出好多新花样（如有啲博赚钱、出名而出书、在报纸撰文，肯定一点否认其余；亦有只谈好处，唔谈怀处；有啲只讲理论，唔讲实际）。我一向嘅宗旨系都要听要睇，但要过脑分析取其精华，触类旁通、融会贯通，绝不盲目附从。君不见蔬菜缺乏时期，大谈冬瓜嘅营养价值，就系唔讲利尿功效对肾虚寒底体弱不利。又如，我曾经按报纸介绍某某靓汤烹饪，结果家人大叫入唔倒口。后来细心想想，该作者只重视食材、药材啲药性、分量，忽视烹饪嘅可行性及用量多寡与味道嘅关系。又如睇到人家家居装修设计好靓、好有特色，照搬过嚟，往往达唔原来效果甚至弄巧反拙，原因系冇结合自己嘅屋形、面积、结构及配置。再如在自己厨房无法复制酒楼的菜式，就系响用镬、用火、用油等等唔同，有啲步骤无法完成（如炸、拉油等，往往留下熟油太多无法处置而减免）、有啲调味料、配料无法找到只能代用。所以只能学其精华而已。盲目跟风嘅后果响炒股、炒普洱中略见一斑。讲到呢度都唔知自己想讲啲乜，乱放葫芦而已。
|
|
